Viktoría!

Ég hitti litla bróður þinn í sundi í dag ;o)
Sundferðirnar hafa séð til þess að ég mun sjá vel frá mér þegar það byrjar að rökkva aftur. Klæði mig bara úr haldaranum og sleppi fermingarsystrunum lausum og þá mun það sem er fyrir framan lýsast upp og ég mun sjá vel frá mér. Allt þetta er sundferðunum og sólinni + bikiní haldaranum að þakka.
Svo vil ég líka kvarta yfir Þórði, hann er mér erfiður!

Brandur Ari

Hjón og börnin þeirra þrjú fóru í útilegu að vatni og tjölduðu. Þau höfðu aðgang að bát við vatnið. Eiginmaðurinn og börnin 3 fóru í skordýraskoðunarleiðangur en á meðan ákvað konan að fara í sólbað, en vegna þess hversu mikið af trjám var þarna og skuggi ákvað hún að róa að eins út á vatnið og ná sér þar í sól, leggjast í bátinn og lesa góða bók og njóta þess að slappa af.
Hún var varla búin að liggja lengi þegar að kom veiðivörður á bát, og spurði konuna hvað hún væri að gera. Konunni fannst það frekar augljóst en svaraði þó til að hún væri að lesa.
"ég er hræddur um að ég verði að fara með þig í land til þess að taka af þér skýrslu, þú ert ekki með veiðileyfi." Konan horfði hissa á hann og sagði "já en ég var ekkert að fara að veiða?"
Veiðivörðurinn svaraði " já en þú ert með allar græjur til þess þarna í bátnum og hvað veit ég nema að þú notir þær?"
"allt í lagi" sagði konan, "ef þú sektar mig þá kæri ég þig fyrir kynferðislega áreitni!"
"já en ég hef ekki snert þig" svaraði veiðivörðurinn.
"nei ég veit" sagði konan " en þú ert með allar græjur til þess og hvað veit ég nema að þú notir þær?"
"hafðu það gott í dag" sagði veiðivörðurinn og silgdi í burtu!
Boðskapur sögunnar er þessi: Aldrei rífast við konu sem les, hún getur nefnilega líka hugsað!

Hit and run

Skrapp í sund í dag sem var voða indælt. Kom svo heim á Ísafjörð og lagði við Bónus og stökk inn til að kaupa eitthvað bakkelsi fyrir glorsoltna krakka, á meðan þau hinkruðu út í bíl.
Er að gera upp við mig hvort ég eigi að kaupa kanilsnúða eða sæmund í sparifötunum þegar eitt afkvæmið kemur inn í búð og tjáir mér það að það hafi verið keyrt á bílinn okkar og að kallinn hafi bara keyrt í burtu.
Þrammaði ég þung á brún út á bílastæði og þar tjáðu hin afkvæmin mér það að einhver jepplingur hefði verið að leggja í stæðið og klesst á okkar bíl, maðurinn hefði líka rifið upp hurðina og sagt að þetta væri bara smá rispa. Eitthvað hefur hann haft slæma samvisku því að hann ákvað að sleppa helgarinnkaupunum og stinga bara af, og var hann á bak og burt þegar ég mætti á svæðið.
Brúnaþunga ég kættist lítið við að sjá "smá" rispuna, því öll framhurðinn var rispuð eftir endilöngu, sem og út á afturhurð og frambretti vel dældað og rispað. Hringdi í 112 og þurfti að bíða í um hálfa mínútu til að fá samband (er þetta ekki neyðarlínan?). Þegar starfsstúlka neyðarlínunnar sjá sér fært að svara eftir dúk og disk var mér gefið samband við lögregluna á Ísafirði, sem mætti vopnuð minnisblokk, penna og myndavél.
Löggi myndaði skemmdir í bak og fyrir og sagði að ef þetta væri ferðamaður þá gæti orðið erfitt, jafnvel vonlaust að finna sökudólginn. En viti menn, lögreglan á Ísafirði hafði upp á kauða á innan við korteri, húrra fyrir þeim. Þeir létu mig vita að manngarmurinn væri miður sín og ætlaði að hafa samband við mig. Manngarmurinn hringdi svo í mig og reyndi að draga úr skemmdum og ýjaði að því hvort að það þyrfti nokkuð að gera tjónaskýrslu. Ég sagðist nú vera hörð á því að þess þyrfti og ætlar garmur að mæta hér á morgun og ganga frá þessu.
Mikið er nú yndislegt hvað fólk getur verið "heiðarlegt".

Kári köttur

Kári, kötturinn minn fer þangað sem honum langar. Hann opnar hurðir eins og að blása úr nös og eru það nokkuð fyndnar aðferðir. Fyrst hoppar hann upp á hurðarhúninn og nær góðu taki á honum með báðum loppum. Lætur svo líkamann dingla á meðan hann hangir í húninum og hossar sér. Oftast opnast hurðinn og Kári köttur fer þangað sem hann hafði ætlað sér.
Ég er hinsvegar búin að sjá við Kára ketti. Ég læsti hurðum sem ég vil ekki að hann opni. Núna langar Kára ketti óhemjumikið út til að næla sér í safaríka þrastarsteik. Hann er búinn að bisa við að opna þvottahúshurðina, því að hann veit að glugginn þar er opinn. Núna síðasta hálftímann er Kári köttur búinn að dingla sér, sveifla sér, hossa sér og þjösnast á hurðarhúninum og ekkert gerist. Ég hlæ inn í mér en kötturinn horfir á mig með fyrirlitningarsvip og grunar mig um græsku.

Rauður nebbi

Fann mér sólríkan og skjólgóðan blett í garðinum mínum í dag. Lagði á jörðina teppi og náði mér í mjúka og góðan kodda. Lagðist niður og kom mér þægilega fyrir svo að sólin gæti sleikt mig sem best. Raknaði við steikingarþefinn sem fyllti andrúmsloftið, fékk vatn í munninn og langaði í steik. Hnusaði út í loftið og uppgötvaði að ég var steikin. Nefið mitt er með puru!

Er hér ennþá

Hef ekki voðalega mikið að segja svo ég skelli bara þessu sígilda skemmtiefni inn.
Það kúka allir !!! Kannast þú við eitthvað af þessu???Draugadrjóli: Þú finnur hann koma út en það er enginn kúkur í klóinu þegar þú kíkir.Hreinn skítur: Sá sem þú skítur og sérð í skálinni en það er ekkert á skeinipappírnum.Eltikúkur: Þegar þú ert búin að kúka og búin að girða hálfa leið upp um þig og fattar að þú þarft að kúka meira.Sprengja-æð-í-enninu hnulli: Sá sem þú þarft að hafa svo mikið fyrir að koma frá þér að þú færð næstum slag.Dauðadrumbur: Svo ógeðslega stór að þú þorir ekki að sturta án þess að búta hann í sundur með blýanti.Loftpressukúkur: Kemur með svo miklum látum að allir í kallfæri flissa.Þynnkuskita: Kemur eftir fyllerí. Helsta einkenni hans eru bremsuförin í skálinni.Maískúkur: Skýrir sig sjálfur.Ohh-ég-vildi-að-ég-gæti-kúkað kúkur: Þú þarft að kúka en situr bara á dollunni og fretar.Mænustunguskítur: Þessi er svo brjálæðislega sársaukafullur að þú ert viss um að hann er á leiðinni út þversum.Rasskinnableytuþrumari (Orkuþrumari): Fer út á svo miklum hraða að afturendinn á þér rennbleytist af klósettvatni.Háklassakúkur: Kúkur sem lyktar ekki.Óvæntur kúkur: Þú ert ekki einu sinni á klóinu því þú hélst að þú þyrftir bara að prumpa en... úps, sparð.Slórskítur: Kúkurinn losnar ekki frá rassgatinu á þér þó þú sért búin að kúka fyrr en þú hristir þig vel.Atómsprengja: Þig svíður undan þessum á leiðinni út og svíður enn í marga klukkutíma á eftir.Mikilmennskukúkur: þú rembist og rembist og svo kemur eitt pínulítið lambasparð.Íþróttaálfurinn: kemur ca. klukkutíma eftir leikfimina.Klippikúkur: sem er svo langur að þú þarft að kúka - klippa - kúka - klippa...

Fráskilin að vestan

Og við það að flytja til Akureyrar. Við Júlíus höfum ákveðið að slíta samvistum og halda í sitt hvora áttina. Ég ætla að reyna að troða sjálfri mér í háskólanám og ef það gengur ekki upp þá fer ég bara að vinna við það sem gefst. Er ekki ósátt en að sjálfsögðu er þetta hundleiðinlegt og erfitt.
Kveðja Ég

Ég fer í fríið

Er á ferðalagi, það er gaman. En bráðum verð ég ekki lengur í ferðalagi og það er ekki eins gaman.

.

Datt ekki í hug nein nógu góð fyrirsögn svo að þessi punktur verður að duga.
Frumburðurinn yfirgaf land og þjóð í gær og stakk af til London með pabba sínum. Næstu 6 vikurnar verður hún á flakki um hins ýmsu lönd. Kanada, Jamaíka, Spánn, Frakkland, Ítalía hafa verið nefnd til sögunnar en allt er óráðið ennþá. Veit að hún á eftir að skemmta sér konunglega og vona að hún komi sæl og glöð heim í haust.
Erfið vika framundan svo ég læt þetta duga í bili.

Fótboltakvöld á pöbbnum

Ég kom mér þægilega fyrir á kaffihúsi Ísafjarðabæjar núna í kvöld til að fylgjast með viðureign franskra og ítalskra. Leikurinn var herfilega spennandi og ég var hreint ekki viss um að ég myndi lifa hann af. Ég gólaði, klappaði og nagaði neglur í æsingnum, en það var ekkert á miðað við manninn sem settist við hliðina á mér.
Ég var farin að hafa áhyggjur af því að hann væri að fá taugaáfall, heilablóðfall, hjartaslag og væri með tourettes allt í einum pakka. Hann öskraði, bölvaði, sló í borð svo að glös hoppuðu og á tímabili var hann farinn að ofanda. Ég var án gríns farin að rifja upp fyrstu hjálp í huganum og var við öllu búin.
Eftir því sem á leið á leikinn var ég farin að taka eftir því að fólkið á staðnum var að horfa á mig með svona samúðarblik í augum. Þau héldu greinilega að ég og hann værum hjón og vildu veita mér smá stuðning með hughreystandi augngotum.
Annars er ég ferlega fúl og ætla hvorki að porða pizzur né pasta hér eftir!!