Morgunblogg

Góðan dag góðan dag, glens og grín það er mitt fag, hopp og hí trallalí upp á nefið nú ég sný.
Gerður mín kemur loksins heim á klaka um næstu helgi og í tilefni af því (og reyndar líka af því að ég þarf að fara á stærðfræðinámskeið) ætla ég að keyra suður á bóginn í fína Rassatinum mínum. Þar mun ég gera lokatilraun til að fá hana til að flytja með mér til höfuðstaðs norðurlands. Ef það virkar ekki þá verð ég bara að kveðja hana með táraflóði og vonast til að verði ekki það aðframkomin af söknuði að ég geti ekki einbeitt mér að náminu.
Stökkmýsnar Þórarinn og Ágúst eru sóðar. Búrið þeirra er svo sem ofsalega snyrtilegt og fínt. En í kringum það, svona ca meter í radíus, er allt útbíað í sagi og subberíi. Þórarinn tapaði þar að auki helmingnum af skottinu sínu í fjarveru minni og er ægilega lítill í sér yfir því (enda agalegt að tapa helmingnum af karlmennskutákni sínu). Hvernig það gerðist er ekki alveg vitað. Langar einhverjum í gráa stökkmús með hálft skott og rauð augu?
Að lokum, mér finnst leiðinlegt að pakka niður og flytja!

Útkeyrð

Og komin heim til mín, eða réttara sagt komin í húsið sem verður heimili mitt í 3-4 daga í viðbót. Næstu dagar fara í útréttingar og vesen. Búin að fá skólapláss fyrir dætur mínar á Akureyri og svo byrjar Jóhann í leikskólanum Sunnubóli 7. sept. Er ekki viss um hvað snýr upp eða niður og er pínulítið kvíðin yfir þessu öllu.
Stalkerinn minn er búin að komast að því að ég er að flytja á hennar svæði. Vakti mig með yndislegu símtali klukkan 00:35 á aðfararnótt laugardags með sínum venjulegum svívirðingum sem hafa á mér dunið síðustu 5 árin. Ætla ekki að láta þessa konu buga mig, held bara áfram að safna svívirðingum í fínu fínu möppuna niður á löggustöð. Æ vill sörvæv.

Hangs í tíma

Sit hér við hlið Sæunnar og bora í nefið. Meiningin er að kenna okkur á webct umhverfið en hingað til þá höfum við ekkert nýtt lært. Fengum þó að njóta einstaklega skemmtilegrar vídeoklippu inn á vefsvæðinu þar sem nokkrir gaurar léku fótbolta í fæðingargallanum.
Þarf svo að keyra heim til Ísafjarðar í fyrrmálið og hlakka ekkert til.

Brynju ís

Við Sæunn ákváðum að í dag væri dagurinn fyrir mig til að smakka Brynjuís. Við lögðum Rassatinum mínum niður í miðbæ og ákváðum að rölta í búlluna og versla þennan ís. Eftir um hálftíma labb vorum við orðnar rammvilltar og voru engan Brynjuís með. Neyddumst til að spyrja til vegar og var þá bent á að ísbúðinn væri alls ekkert í miðbænum. Næsta skref var að stökkva inn í Rassatinn og tæta af stað í ísátt.
Nokkru síðar vorum við komnar með ís í hönd og ákváðum að tilla okkur á bekk sem var þarna við búðina. Hlupum æpandi í burtu þar sem geitungum finnst Brynjuís greinilega einstaklega góður.
Ákváðum að öruggara væri að borða bara ísinn í bílnum. En þar sem okkur var afskaplega heitt þá hafði ég hurðina opna. Auðvitað kom geitungur Jónsson undir eins og gerði sér lítið fyrir og tróð sér inn í bílinn. Við Sæunn hentumst út á leifturhraða, vælandi eins og kellingum er einum lagið. Í látunum lenti ísinn minn í götunni en herra geitungur sat sem fastast inn í bíl.
Nú voru góð ráð dýr. Sæunn átti að mæta upp í skóla eftir klukkutíma og við vorum ekkert vissar um hvort að kvikindið yrði farið nógu tímanlega. Hægt og rólega fikraði hetjan ég, mig að bílnum og aðgætti hvar flugudruslan væri niðurkomin. Sá ekki tangur né tendur af röndótta rassinum en þorði engu að síður ekki að setjast inn í bíl. Við vorum handvissar um að óvætturinn myndi fljúga upp um leið og við værum komnar út í umferð og það hefði geta farið illa þar sem Sæunn var viss um að hún myndi stökkva út á ferð og ég var viss um að ég myndi snarnegla niður á punktinum og hlaupa út.
Á endanum tókum við samt sénsinn og ókum á leifturhraða í gegnum bæinn og heim til Palla bróður. Ekkert bólaði á geitungnum en ég er samt sannfærð um að hann er ennþá inn í bílnum og muni fljúga upp þegar ég á síst von á því.

Ekki lengur heimilislaus

Búin að á íbúð á Akureyri VÍHA!
Vaknaði klukkan 6 í morgun, dröslaðist út á flugvöll klukkan 7 og flaug þaðan með henni Sæunni alla leið til Agureyris þar sem á móti mér tók minn unaðsfagri VW Rassat. Eftir að við höfðum verslað okkur pínu lítið skóladót renndum við upp í háskóla og gengum stoltar inn. Vorum reyndar reknar út aftur þar sem við vorum í rangri byggingu. Svo var setið á hörðum stól, sem lét rassinn svitna það vel að maður leit út fyrir að vera pissublautur, næstu klukkutímana og námsefni annarinnar kynnt. Um klukkan 17:00 var ég farin að draga ýsur og hætt að heyra hvað blessaður aðjúnktinn var að tala um. En sem betur fer var okkur hleypt heim stuttu síðar því ekki hefði það nú verið gæfulegt að sofna á fyrsta degi í háskólanum.
Bruna heim á Ísafjörð á Sunnudag og fer beint í að klára að pakka. Svo er brunað aftur á suðvesturhornið þann 31. ágúst og glímt við smá stærðfræði í 2 daga áður en ég bruna norður í Strandasýslu til að sækja börnin og þaðan heim til Akureyrar.
Púffff nú vantar mig star trek bímíng tækni.

Húbbahúlle

Sit hér upp í KHÍ með lappann hennar Viktoríu og svala netfíkn minni sem og drep tíma í leiðindar rigningarsudda. Eftir búðarráp gærdagsins er pyngjan orðin ansi létt og því held ég að það sé bara best að sneiða fram hjá búðum í dag. En boj hvað það er stundum gott að sleppa sér í eyðslu einu sinni á 5 ára fresti.
Eyddi deginum í gær í að súpa kakó með Sæunni, hitta Rannveigu í vinnunni hennar, kíkja á Finnu frænku í slorið í Hafnarfirðinum, búðarápast með Viktoríu og svo loks fara á Austur-Indíafjelagið og borða hrikalega góðan mat. Slöppuðum svo af í salalauginni fram til klukkan hálf ellefu um kvöldið.
Á morgun er svo ræs klukkan allt of snemma því að það er mæting í flug klukkan 7:00.
Polly-Gunna! Hvað á það að þýða að vera í fríi þegar ég kem að heimsækja þig í vinnuna?!?
Over and out, Stresshildur O. Sörensen

Bæjarferð ójá

Klukkan nákvæmlega rétt tæplega 10 í fyrramálið verður hún ég komin suður til Sódómu. Þarf að reyna að drösla mér upp í KHÍ þar sem ég hafði hugsað mér að ræna bílnum hennar Viktoríu minnar og spóka mig um á honum, á meðan hún situr sveitt yfir skólabókunum. Eftir að hún er búin að svitna þá förum við væntanlega að kellingast eitthvað áður en haldið skal upp í einhvern kofagarm upp við Elliðavatn. Kofagarmur dugar okkur svo sem, við erum vanar ýmsu sveitastúlkurnar sjálfar.
Nýjir heimilismeðlimir hafa bæst í hópinn. Stökkmýsnar Ágúst Óskar og Þórarinn horfa ögrandi framan í Kára og Fóu ketti og ulla feitt. Held að Kári sé að reyna að drekkja þeim í slefi.
Stressköggullinn stækkar í maganum á mér enda ekki nema rétt rúm vika í flutninga og margt eftir að gera. Er samt full af eftirvæntingu og framtíðin er nokkuð björt.

Timburmenn.is

Á Á Á Á Á Á mig auma! Er með einhverja óútskýrða flensu í dag og skil ekkert í því hvernig ég náði mér í hana. Gæti ekki mögulega verið sú staðreynd að við Jóna skelltum okkur út á lífið í gær og drukkum bara örlítið söngvatn. Skemmti mér alveg frábærlega þar til dónakallar voru farnir að þukla á mínum unaðs fagra rassi og 29 ára foli vildi endilega velja mig til þess að stunda kynlíf án allra skuldbindinga með, þá flúði ég af vettvangi og hélt heim á leið. Afþakkaði gott boð um kynlíf án allra skuldbindinga og hugsaði með mér hvað karlmenn eru fyndnir þegar þeir þurfa að losa sig við þrýsting
Andrea komin heim og mamma komin og farin aftur. Hér eru pappakassar út um allt hús og flestir eru reyndar orðnir fullir. Fer að vinna í fyrramálið en svo er það höfuðborg Íslands á þriðjudagsmorgun og því næst höfuðstaður norðurlands. Útréttingar smútréttingar og allt á smilljón.

Skvett úr klaufum

Síðasta helgin mín þar sem ég verð stödd á Ísafirði núna og af því tilefni ætla ég að skvetta úr klaufum með henni Jónu minni. Mikið er nú skrítið að yfirgefa þennan bæ sem ég flutti í fyrir 18 árum síðan. Á eftir að sakna hans pínulítið, en það er líka kominn tími til að prófa eitthvað nýtt. Ætla að sötra hvítvín og sjá svo til hvað við gerum. ´
Þar til síðar.

Ég er ástfangin

En áður en ég fjalla um tilfinningar mínar þá bara verð ég að koma því að, að ís er góður.
Svo kemur hún Andrea mín loksins loksins heim til Íslands í kvöld. Merkilegt hvað ég er búin að sakna þess mikið að láta minna mig á hvað ég sé púkó, fávís og almennt ofsalega hallærisleg og til skammar á almannafæri. Á morgun flýgur Drési minn svo heim í móðurhús og þá verður gaman. Mútta kemur líka á morgun og æltar að aðstoða mig við hraðpakkið.
En aftur að ástinni. Var stödd í afleysingarvinnu minni í dýrabúð Ísafjarðar þegar inn labbar ungur maður. Í fanginum á þessum unga manni var 10 vikna Rottweiler hvolpur. Ég féll kylliflöt fyrir þessu rassgati og ætla að berjast fyrir hjónabandi á milli manna og hunda. Ástin er yndisleg.